EGIN 1977ko irailaren 27an sortu zen, Euskal Herriaren eraikuntza nazionalean laguntzeko kazetaritzako proiektu enpresarial gisa. Haatik, proiektuaren izaera kolektibo eta herritarra nabarmena izanik (hau da bere nortasunaren berezitasunik adierazgarrienetakoa), aurrez "eginzale" asko eta askoren lana antolatu behar izan zen proiektua abiarazi ahal izateko behar zen gutxienezko kapitala biltzearren: gogora dezagun lehen kanpaina honetan 20.000 kide baino gehiagoren aportazioa lortu zela.