'Egunkaria auziko' protagonisten lekukotasunarekin, epaiketaren kronika osatu du Pello Urzelai kazetariak

«Sentitu, sufritu eta borrokatu» dutenaren kronika da, hainbat bitxikeriaz lagunduta

«Batez ere auzipetuengatik» egin du Pello Urzelai kazetariak Amesgaiztoa. Egunkaria auziko epaiketaren kronika liburua. «Haiek merezi dute bizi izandakoaren lekukotasuna idatzita gelditzea. Sentitu dutena, sufritu dutena, borrokatu dutena». Atzo aurkeztu zuen liburua Urzelaik, Martin Ugalde Foroan. Aurrean zituen Joan Mari Torrealdai, Iñaki Uria eta Xabier Oleaga auzipetuak, eta alboan Martxelo Otamendi. Txema Auzmendik ez zuen aurkezpenera joateko modurik izan.

Euskal Herriko Unibertsitateko lau kidek egindako bi txosten jasotzen ditu Ttarttalok argitaraturiko «Egunkaria, amets baten egia»-k. Liburuak «Egunkaria»ren bizitza azaltzen du, sorreratik itxierara artekoa.

Defentsak eta Fiskaltzak eskatu bezala, Gipuzkoako auzitegien esku utzi du auzia, ez duelako terrorismo delituekin zerikusirik

Egunkaria auziak lotura denak eten ditu Espainiako Auzitegi Nazionalarekin. Sumario nagusian irmoa da absoluzio epaia, eta auzi ekonomikoa epaitzea ez dagokiola berari erabaki du Auzitegi Nazionalak berak. Defentsak behin eta berriz emandako argudioa bere egin du Jose Maria Vazquez Honrubia epaileak, eta auzia Gipuzkoako auzitegien esku uztea erabaki du. Auzi horretan ikertzen diren balizko delitu ekonomikoek ez dutela «terrorismo delituekin» zerikusirik adierazi du epaileak atzo kaleratutako autoan, eta, beraz, ez dagokiola berari balizko delitu horiek ikertzea.

Espainiako egunkari batek dio AVTk ere «zailtasunak» dituela epaiaren argudioei aurre egiteko

Egunkaria auzian herri akusazio gisa aritu den Dignidad y Justicia elkarteak ez du Egunkaria-ren absoluzioaren kontrako helegiterik aurkezteko asmorik. Hala jakinarazi du haiekin harremanetan jarri eta gero Radio Euskadik. Era berean, El Mundo egunkariaren arabera, erabaki bera hartuko luke AVTk. Kazeta horrek dio elkarte horrek «zailtasunak» dituela Espainiako Auzitegi Nazionalaren argudioei aurre egiteko. Hori baieztatuko balitz, «albiste ona» litzatekeela adierazi du Iñaki Uria Egunkaria-ko kontseilari ordezkari ohiak: «Epaia behin betiko bihurtuko litzateke eta ez genuke [Auzitegi] Gorenaren zain egon beharko». Hala ere, azken unera arte «zuhurtziaz» jokatu behar dela ohartarazi du.

'Egunkaria auziko' absoluzioaren ostean, auziaren kontra indarra egin dutenei eskerrak emateko ekitaldia egin dute. Auzi ekonomikoa irekita dagoela ekarri dute gogora.

Indarrak bilduta, elkar hartuta, bat eginda. Halaxe aritu da Euskal Herria Egunkaria auziaren kontra, bost auzipetuen iritzian. «Zuek zarete sententzia honen meritudun nagusiak», esan zuen Joan Mari Torrealdaik. Eskertuta agertu ziren oso, eta emandako «solidaritatea, elkartasuna, atxikimendua, sostengua, babesa eta maitasuna» txalotu zituzten. Nolanahi ere, gogora ekarri zuten Egunkaria-ko auzi ekonomikoa ere epaiketara bidean dela eta zigor eskaera gogorrak daudela auzipetuentzat. Orain arte bezala, bat eginda, laguntzen jarraitzeko eskatu zieten Euskalduna jauregian bildutakoei. «Bigarren absoluzioarekin amaitu behar du gure historiak».

Katalunia eta Espainiako babes taldeek diote epaiak oso leku txarrean uzten dituela epaile instruktorea eta Polizia

Zazpi urtean «sufritutakoaren» ostean, botere publikoek eragindako kalte guztiak konpontzeko eta kalte-ordainak emateko exijitu dute Egunkaria-ren aldeko Espainia eta Kataluniako plataformek. Baita «berez injustua den legedi bat legez kanpo aplikatu zuten pertsonek» euren erantzukizuna onar dezaten ere. Epaiak epaile instruktorea -Juan del Olmo- eta Guardia Zibila «oso leku txarrean» uzten ditu, babes taldeen arabera, eta «ustezko frogak» asmatu izana leporatu diete arduradun horiei, guztia, egunkaria ixteko «helburu bakarrarekin» egin zutelako.

Absoluzioarekin gainean zeukaten «zama handia» arindu egin zaiela adierazi dute epaituek, Andoainen eginiko agerraldian

Epaiak «bultzada politikoko» beste auzietan eragin baikorra izatea nahi dutela esan dute

Absoluzioaren epaia jakin berritan, etorkizunean gerta litekeena dela eta, «erne» egoteko eta ez lasaitzeko eskatu zioten atzo Egunkaria auziko bost epaituek gizarteari, Andoaingo Martin Ugalde kultur parkean eginiko prentsa agerraldi batean. «Amaiera on batetik gertuago egon arren» oraindik ez delako amaitu. Akusatzaileek berandu baino lehen Espainiako Auzitegi Gorenean helegitea jartzea litekeena delako eta auzi ekonomikoaren epaiketa oraindik egiteke dagoelako.

Euskarazko prentsari kolpe gogorra eman zion Guardia Zibilak duela zazpi urte, Euskaldunon Egunkaria itxita. Juan del Olmo Espainiako Auzitegi Nazionaleko epailearen agindua lortu zuten horretarako, ordurako aski ezagunak ziren agiriak erabiliz hainbat txosten idatzita. Euskarazko egunkari bakarra ETArekin lotzeko frogak bilatzeari ekin zion gero, baina ez zuten ezer berririk aurkeztu. Hala ere, ez zioten beren eginahalari utzi. Aurrera jarraitu zuten, eta, fiskala kontra izan arren, epaiketa egitera iritsi ziren. Auzi gelan ere tinko egin zuten beren tesien alde, eta azken unean txosten gehiago ere idatzi zituzten, betiko tesiak errepikatuz.

Guardia Zibilak Espainiako Auzitegi Nazionalaren aginduz «Egunkaria» itxi zuenetik gaur 7 urte betetzen direla oroitarazi zuten atzo Andoaingo Martin Ugalde Kultur Parkean. Euskal gizarteko hainbat lagun ezagunek eta alderdi politikoetako hainbat ordezkarik babes osoa eskaini zioten Martxelo Otamendi, Joan Mari Torrealdai, Iñaki Uria, Txema Auzmendi eta Xabier Oleagari.